Не – вайне! Прынамсі некалькі сотняў чалавек узялі ўдзел у Народным Сходзе, які адбыўся напярэдадні ўвечары на Плошчы Свабоды ў Менску. Людзі пратэставалі супраць расейскай авіябазы, якую Крэмль мае намер размясціць на тэрыторыі нашае краіны.

Паводле арганізатараў, гэтым разам удзельнікаў сабралася болей, чым на папярэдняй акцыі 23 верасня. Яшчэ больш неабыякавых суграмадзянаў апазіцыянеры, на якіх міліцыянты склалі чарговыя пратаколы за арганізаванае і правядзенне несанкцыянаванай акцыі, чакаюць ужо 10 кастрычніка, напярэдадні прэзідэнцкіх выбараў. У час наступнай акцыі галоўным патрабаваннем да ўладаў станецца правядзенне сумленных і свабодных выбараў у краіне. У «Гарачым каментары» – лідар грамадскага руху «За дзяржаўнасць і незалежнасць Беларусі» Уладзімір Някляеў.